By Rethabile Moshabe
MASERU
Litho tsa Lekhotla la Tlhopho Bocha (NRA) li bile le kopano moo ‘moko-taba e neng ele ho tšohla litaba tse amanang le ntšetso-pele ea phutheho e tloaelehileng ea lona ea leshome le metso e tšeletseng (16th Ordinary Meeting) ka ‘Mantaha.
Litho li ile tsa fetola mpshane tsa kena lingangisanong tse amanang le nyeooe e seng e kene ka khotla ea ho hloka tšepo ho Motlatsi oa molula-setulo oa Lekhotla la Tlhopho Bocha le keketso ea matsatsi a tšebetso a lekhotla a amang litho.
Molula-setulo oa Lekhotla la Tlhopho Bocha Morena Pelele Letsoela puong ea hae haa amohela litho o itse o hlokometse hore ka la 01 Tšitoe ho bile le phutheho ea litho ‘me mahlakore a ileng a emeloa moo a bile mabeli ha Laboraro ebile la molula-setulo oa Lekhotla la Tlhopho Bocha le Motlatsi oa hae.
O itse ka labohlano o ile a fumana kopo ea lekhotla e entsoeng ke tse ling tsa litho tsa lekhotla ‘me kahare ho eona e na le mahlakore a mabeli, lehlakore la pele ke le kentseng kopo e potlakileng ea lekhotla ka la 08 Tšitoe selemong se holimo ha la bobeli e le la baikarabelli ba tšeletseng e leng molula-setulo oa lekhotla la tlhopho bocha, mookameli oa lekhotla ka bo-eena le ka boemo ba hae ba mosebetsi, Motlatsi oa mookameli ka bo-eena le ka boemo ba hae ba mosebetsi le lekhotla ka bolona.
“Ha litaba li se li le tjena ho bolela hore ho latela chebo ea molula-setulo oa lekhotla, tlaleho eo Letona la Toka le Tlhabollo ea Batšoaruoa e neng e lokela ho fana ka eona phuthehong ena e ka se tsoele-pele kaha molao ha o lumele. Ha taba ele ka khotla kapa ho tsekisanoa ka eona phuthehong ea mofuta ona, e se e tla rarolloa ke makhotla,” Letsoela a rialo.
Ramolao e moholo oa ‘muso Monghali Rapelang Motsieloa haa tšoaela litabeng tsena o itse haele mona molula-setulo a se a entse qeto ea hore litaba tsa Letona la Toka le Tlhabollo ea Batšoaruoa tsa bokena lipakeng li ka se tekoe, haa hanane le ena empa haa tsebe na ebe ke hoba a ile a batla keletso ea molao.
Letona la Toka le Tlhabollo ea Batšoaruoa Advocate Lekhetho Rakuoane puisanong e ikhethileng le baphatlalatsi ba litaba o itse ebile mokena lipakeng tjena nakong eo ho neng ho thoe ho tlosoa Motlatsi oa molula-setulo oa lekhotla la tlhopho bocha ho thoe haa eletse Molula-setulo oa Lekhotla la Tlhopho Bocha le nako ea keketso ea nako ea tšebetso ea lekhotla kantle ho ea basebetsi.
Rakuoane o itse likateng tsa tlaleho ena ke ho etsa keletso ea hore mahlakore ka bobeli a lule fatše a ithute tlaleho ena, a shebe melemo ea qoso le ho lumellana e le ho shebisisa na nyeoe ena ka boeona e sa na le thuso kapa e tlo ba senyetsa nako e le litho ha ba emela makhotla ho nka qeto kapa ba ka iketsetsa kahlolo e le bona.