Ka: Lebohang Maluke
MASERU
Lekala la Temo, Kanetso ea Lijo le Phepo e nepahetseng tlasa morero oa SADP II le tšoaretse bahlahisi letsatsi la limaraka. Letona la Temo, Mohl. Thabo Mofosi, o tobokelitse bohlokoa ba morero oa bo bapatsa sethaleng sa marakeng, haholo karolong ea eona ea ho thusa lihoai ho hokahana le ho sebelisana le bareki marakeng.
Boikitlaetso bona bo fetohile sethala sa bohlokoa bakeng sa lihoai ho bontša lihlahisoa tsa bona, ho haha likamano, le ho arolelana mehopolo sebakeng se bulehileng. Mohl. Mofosi o totobalitse morero ona o thusa lekala, ho thusa lihoai ho hlola liqholotso tse ba tobileng le ho theha mekhoa e tsitsitseng ea ho fumana chelete.
Morero ona oa ke karolo ea bohlokoa temong ka bophara, o reretsoeng ho ntlafatsa polokeho ea lijo, ho matlafatsa kholo ea moruo, le ho atametsa lihlahisoa tsa lihoai ho bareki. E ‘ngoe ea likarolo tse hlahelletseng tsa morero ona ke moo lihoai li ka buisanang ka kotloloho le bareki le ba bang ba amehang.
Limaraka tsena li fana ka monyetla o ikhethang oa hore lihoai li rekise lihlahisoa tsa tsona, li arolelane mekhoa e metle, ‘me li hokahane le batho ba bangata.
Lihoai tse kentseng letsoho limarakeng li bontšitse thabo ea tsona ka monyetla oa ho fumana chelete e ngata ha ba ntse ba ithuta litsebo tsa bohlokoa tse ba thusang ho holisa likhoebo tsa bona. Ba bangata ba hlokometse hore tikoloho ea maraka e ba lumella ho kopana le ho ithuta ho tsoa ho lihoai tse ling, ho fumana leseli mabapi le mekhoa e atlehileng ea temo, maano a ho bapatsa, le mekhoa ea morao-rao ea temo.
E mong oa bahlahisi, Mof. Mathabiso Liphoto o re thabo ea hae ea khaphatseha hobane ka letsatsi lena la limaraka o atlehile ho etsa chelete e ngata hoba hono hlophisehile hantle.
Leha hole joalo, phapanyetsano ea litsebo li matlafalitse lihoai mekhoeng ea tlhahiso, ho ntlafatsa tlhahiso ea lihlahisoa tsa bona, ‘me qetellong, ho holisa likhoebo tsa bona. Ntle le ho fana ka matlafatso e tobileng ea lichelete, maraka o boetse o file lihoai monyetla oa ho utloisisa hamolemo litakatso tsa bareki le mekhoa ea limaraka, e leng bohlokoa bakeng sa ho fetola likhoebo tsa bona ho fetola litlhoko tsa bareki.
Ho feta moo, boikitlaetso ba limaraka bo boetse bo thehile maikutlo a sechaba hara lihoai. Maikutlo a bonngoe le ho tšehetsana ho thusitse lihoai ho ikutloa li le sebete ho tobana le mathata.
Letsatsi la limaraka ha se sebaka sa hore lihoai li rekisetse lihlahisoa tsa tsona feela; ke sebaka seo ho arolelanoang maikutlo ho sona, ho theoa litšebelisano-’moho, ’me ho khothaletsoa kholo ea temo. Katleho ea morero ona e sebetsa joaloka bopaki ba matla ba tšebelisano-mmoho ho hlola liphephetso tseo lihoai li tobaneng le tsona.