Ka: Puseletso Maqoaelane
Maseru
Letona la Temo, Kanetso ea Lijo le Phepo e nepahetseng, Mohlomphehi Thabo Mofosi o re karolo ea mashome a mararo a metso e mehlano lekholong ea bacha e tla una molemo morerong o reretsoeng ho nyolla moruo le boitšematlelo khahlanong le phetoho ea boemo ba leholimo ho lihoai tsa Farelane le Seiboko. Khakolo ea morero ona oa lilemo tse supileng e bile Maseru.
Mohlomphehi Mofosi o totobatsa hore morero ona o reretsoe ho arabela liqholotso tse ka har’e ho khoebo ea thekiso ea boea, tse kenyeletsang tlhahiso ea likhutšoane le menyetla ea tšehetso ea lichelete ho lihoai.
Ka thuso ea likhutšoane le tšehetso ea lichelete, lihoai li tla ba le bokhoni ba ho ntšetsapele mehopolo ea bona ea khoebo le ho eketsa tlhahiso ea likhutšoane tse hantle tse bileng li matlafetseng. Morero ona o reretsoe ho fana ka tšehetso ka tsela e makatsang ho lihoai e le ho ntšetsa khoebo pele.
Sena se tla boela se fana ka morolo ho lihoai tse seng li oele moea ka lebaka la mathata ao ba teanang le ona leruong la bona ekasitana le likhoebong tsa bona tsa thekiso ea boea. Bacha ba bang ba tla khahloa ‘me le bona e se eka ba ikakhela ka setotsoana khoebong.
Monghali Khotso Lepheane ho tsoa mokhatlong oa naha oa Lihoai(LENAFU) o re ke boikarabello ba motho e mong le e mong ekasita le ba likhoebo tse ikemetseng ho bona hore naha ea Lesotho e hlahisa lijo tse lekaneng.
Motsamaisi oa morero WAMCOP, o re ke nako ea hore naha ea Lesotho e behelle chelete ka thoko e le ho netefatsa hore khoebo ea boea e etsa phapang ka har’e ho naha ea Lesotho.
Morero ona oa nyolla moruo le boitšematlelo khahlanong le phetoho ea boemo ba leholimo ho lihoai tsa Farelane la Seiboko o tšehelitsoe ka chelete e ka holimo ho mashome a supileng a litolara tsa Amerika ho tsoa ho letsete la lefatše la ntlafatso ea Temo.
Morero ona o tla ba le tšusumetso e ntle ho bacha le ho lihoai tsa Farelane le Seiboko. Mohlomphehi Thabo Mofosi o bontšitse hore karolo ea mashome a mararo a metso e mehlano lekholong ea bacha e tla una molemo morerong ona o reretsoeng ho ntlafatsa bophelo, moruo ekasita le boitšematlelo.