Ka: Puseletso Maqoaelane
Maseru – Motlotlehi Mofumahali Masenate Mohato Seeiso o ipilelitse ho basali ba bileng khakolong ea mokhatlo oa lipuisano tsa basali Lesotho e leng LWID ho loanela khotso ea naha ka ho theha sethala sa ho thakelana ka malebela lintlheng tse fapakaneng tsa bophelo le ho tsetselela maano a behang basali ka pele ntlafatsong.
Moporesitente oa LWID, Ngaka ‘Mats’epo Ramakoae o re morero ona oa basali ke ho ipopa ngatana ngoe litabeng tse amang basali lefat’seng, a re sethala sena se tsetselela matlafatso ea basali le ho netefatsa hore maikutlo a bona a eloa hloko.
Mofumahali Beatrice Mukutu ho hlaha ho Sethala sa basali sa lipuisano sa Afrika Boroa e leng SAWID o thoholelitse basali ba Lesotho ka mohato ona oa ho theha sethala sena kaha se tla ho matlafatsa lentsoe la bona. A re sethala sa Afrika Boroa se se se hatetse pele haholo matlafatsong ea basali.
Letona la Tekano, Mohlomphehi Pitso Lesaoana o re HIV\AIDS, tlhekefetso le tlhokahalo ea tekano ke tse ling tsa liqholotso tse amang basali le banana tikolohong ea Afrika. A boela a hlakisa hore oa ts’epa hore basali ba tla sebelisa sethala sena ho matlafala le ho fumana tharollo ea liqholotso tse ba tjametseng.
O boetse a hlalosa hore ‘muso o na le boikarabello ho batho bohle ho kenyeletsa basali, banana le batho ba bang, ka hona tlhekefetso le matlafatso ea basali e ka sehloohong ho ‘muso.
Motlotlehi Mofumahali Masenate Mohato Seeiso ebile e le mohlokomeli oa LWID o re tlhokahalo ea tekano e tloaelehile, a re leha ho le joalo o lumela hore LWID e tla hlola liqholotso tsena.
Matlafatso ea basali ke leano le bohlokoa le matlafatsang basali ho ba matla, ho iketsetsa le ho fumana litlhoko tsa bona.
Ts’usumetso ke karolo e ngoe e hlokahalang ea ho phahamisa le ho matlafatsa basali. Basali ba lokela ho khothaletsoa ho ba le ts’usumetso ho ba bang, ho ba fa ts’ehetso le ho matlafatsa litlhoko le boikutlo ba bona. Ho matlafatsa litlhoko tsa basali ho phethela mehopolo e amanang le ho ts’ehetsa liqeto tse amanang le bophelo ba bona.
Ho matlafatsa basali ho thusa ho hlahisa mehopolo le liphetoho tse amanang le bophelo ba basali le sechaba. Hape ho khutlisa morolo oa basali ba seng ba lahlile boits’epo.
Ka kakaretso, ho matlafatsa basali ho melemo e mengata e amanang le bophelo, thuto, boikemisetso, ts’usumetso le tsoelo-pele. Ho matlafatsa basali ho fa sechaba le bohle monyetla oa ho sebetsa ka katleho le ho fihlella meoloane e fapaneng.