Ka: Puseletso Maqoaelane
Mohale’sHoek
E le ho akofisa morero oa naha oa ho bona hore lits’ebeletso tsa bophelo li fihlela ho banna kaha ba hlalosoa ke litsi tsa bophelo ba le lesisitheho ho ea lits’ebeletsong tsa bophelo, mokhatlo oa JHPIEGO o khakola leano le lecha moo o sebelisang papali ea bolo ea maoto ho anetsa bohlokoa ba rola katiba e le ho fokotsa ts’oaetso ea HIV\AIDS.
Mohlophisi oa morero ona, monghali Mothae Moletsane o supa hore ba fumane lithuso ho tsoa letseteng la Amerika la lithuso hore morero oa ho fana ka lits’ebeletso tsa rola katiba o atlehe ka har’e ho naha. O re ba se ba ena le lilemo tse ka holimo ho tse leshome ba fana ka lits’ebeletso tsena.
O tsoelapele a hlalosa hore bontate joalo ka lihlooho tsa malapa, ba lokela ho sireletsa malapa a bona le sechaba seo ba phelang le sona ka hore ba qobe mafu afe kapa afe a ka bang teng, ho shejoe haholo ts’oaetso ea kokoana hloko ea HIV, litaba tsa mofets’e oa bo’m’e oa popelo.
Ho sale joalo morena le ba bang ba bileng le seabo ba babatsa mokhatlo ona ka mohato ona. Ba ipiletsa ho ba es’o role katiba ho etela litsi tsa bophelo ka nako e le ho fokotsa sekhahla sa ts’oaetso ea mafu a likobo le kokoana hloko ea HIV.
Mofumahali Mamohale mohale ea buoang lebitsong la morena oa sehlooho oa Tajane o re ho libapali le ho bacha bohle, o ba khothaletsa ho ema ka thata ba its’oareletse ka papali ba tsebe ho hlola sebe esebe mohlomong ba oela molekong, ba etsa lintho tse seng hantle tse tla etsa ba llele lebese le qhalaneng.
Tiheli Kabelo e le e mong oa libapali o leboha morero ona hobane o totobatsa hore o ba thusitse e le libapali haholo ba neng ba sa tsebe hore na ba ka fumana lits’ebeletso joang metseng le metsaneng. O boela a khothaletsa ba es’o iponahatse hore ba tatele moo pitsa li hobang nako esale teng e sebe ba aha serobe phiri e se e jele.
Mookameli oa morero oa JHPIEGO Ngaka. Zebendee Mwandi o toboketsa bohlokoa ba morero ona.
Mokhatlo oa JHPIEGO o hlahisa leano le lecha le amanang le papali ea bolo ea maoto ho fa libapali le libohi bohlokoa ba rola katiba. Leano lena le akaretsa ts’ebeliso ea papali e le mokhoa o amanang le ho eketsa tsebo le kutloisiso ka HIV\AIDS. Ka ho sebelisa papali ea bolo ea maoto, mokhatlo ona o phahamisa thuto ka kotsi ea HIV, ho fa batho monyetla oa ho ithuta le ho nka mehato e nepahetseng e amanag le bophelo bo botle.
Leano lena le amana le ho fokotsa ts’oaetso ea HIV\AIDS ka ho hlakisa bohlokoa ba rola katiba. Rola katiba e thusa ho fokotsa kotsi ea ho ba le HIV le ho etsa hore batho ba ithute mekhoa e metle ea bophelo bo botle le tlhokomelo ea botho.
Papali ea bolo ea maoto e fa sechaba sebaka sa ho ikopanya, ho ithuta le ho eketsa ts’epo ka bophelo bo botle, ka ho thusa le ho matlafatsa tsebo le ho eketsa ts’epo ka bophelo bo botle.
Leano lena le boela le bont’sa hore mekhoa e mengata eo lipapali li ka sebelisoang ka teng, ba bang ba rekisetsa lihlahisoa tsa bona nakong eo ho nang le lipapali mabaleng, ba bang ba rekisa lits’ebeletso tsa bona ka ho ts’oana.