Ka: Puseletso Maqoaelane
Maseru
Libapali tsa basali tsa papali ea litebele li re li tobane le qholotso ea ho sikisetsoa papaling ea litebele ka tumelo ea hore ke papali ea banna. Litaba tsena li hlahelletse litlholisanong tsa libapali tsa litebele mekhahleng ea banna le basali ho tsoa literekeng ka ho fapana boitukisong ba ho ea litlholisanong Afrika Boroa ka Mphalane.
Libapali li re ka lebaka lena, thahasello ea basali papaling ena e ea fokotseha leha taba-tabelo ea bona e le ho bona basali ba ena le seabo se toma papaling ena.
Se seng sa libapali tsa litebele, Rapelang Maselela o totobatsa ha basali ba tobane le qholotso ea khethollo papaling ena, ‘me e se eka ba ka fuoa monyetla oa ho bont’sa neo ea bona. Ntle le mona o hlalosa hore libapali li tjametsoe ke qholotso ea tlhokahalo ea thepa ea boikoetliso bo nepahetseng e le hore ba be malala-a-laotsoe nakong ea litlholisano.Ho sale joalo, libapali tse ling li re li una molemo papaling ena ka tsela ea boithapollo.
Monghali Koloba Sehloho, motsamaisi oa mokhatlo oa papali ea litebele Lesotho o re tlholisano ena ebile sethala ho basali ho bonts’a lineo tsa bona. Haa tsoelapele o re ba ntse ba e’so fihlele moo lipelo li labalabelang empa sena se etsoang kajeno ke sesupo sa hore ba se ba kene temeng ‘me Basotho ba lokela ho tseba ‘me ba nke karolo, ba se ke ba ea feela ba il’o shebella. O bile o ipiletsa ho bona hore ba ikakhele ka setotsoana hobane seo se ka ba tsoalla namane e tona.
Mofumahali Makatleho Lefoka, motsamaisi oa papali ea litebele ea basali o re sehlopha sa basali se tsamaea mehlaleng le sehlopha sa banna kaha ba ikemiselitse ho hlola, o boela a totobatsa hore tlholisano ena e boetse e thusa hore ba hloae ka nepo le ka toka sehlopha se tla emela naha lipapaling tse tlo ba Afrika Boroa.
Haa thathiselletsa sena o re o ipiletsa ho mafapha ohle a ka hare ho lipapali ka har’a naha ea Lesotho, ba utloe sello sa bona ha ba ba bitsa hobane taba-tabelo ena e kholo hakana e tsoa ho Lesotho National Olympic Committe (LNOC) le Lesotho Sports and Recreation Commission (LSRC) ea hore ba bone hore basali baa hola, ka hare ho lipapali le ka har’e ho botsamaisi ba lipapali, ebe batsamaisi ba basali ba eketseha.
Haa phethela litaba tsa hae o re ba ts’ehelitsoe ke LNOC le LSRC ka mokhoa oa ho ba fa likoetliso tse molemong oa basali hore papali e hole.
Papali ea litebele ke karolo ea bohlokoa ho tsebo, boithapollo le boithuto empa e ntse e le leeme le nang le mathata a amanang le khopolo le tumelo ea hore e ts’oanetse banna fela, e leng phoso e kholo. Libapali tsa basali li ntse li tobane le qholotso e kholo ea ho fumana leeto la tsona le ho amoheloa ka botlalo papaling ena.
Qholotso e ‘ngoe ke tlhokahalo ea lisebelisoa, ese eka sena se ka ea moriting kaha libapali li bont’sa mosebetsi oa tsona o sa tsamae ka thello.
Mokhoa o ka finyellang sena ke ho kenya ts’ebetsong mekhoa e metle ea ho ts’ehetsa le ho hlahisa litlhahiso tse amanang le le ho kenya liphetho tsa ho khetholla basali le ho ba fa sebaka se lekaneng sa ho etsa le ho fihlella sephetho se seholo. Ho bohlokoa hore ho hlahisoe leano le phahameng la tekatekano le ho hlahloba mekhoa ea ho netefatsa hore ho na le sebaka se se nang mefokolo bakeng sa libapali tsohle e le ho netefatsa hore papali ea litebele ke ea sebele bakeng sa bohle.